Соторутааҕыта «Президентский фонд культурных инициатив» 2023 с. бастакы куонкуруһа түмүктэннэ. Онно «Местная Общественная Организация по содействии в развитии и благополучии детей Чурапчинского улуса «Коркинец» (сал. Кардашевская О.Г.) иһинэн кыттан биһиги оскуолабыт кыайыылааҕынан таҕыста уонна 986 821 солк.суумалаах Граны ылла.
Капельки. Мы дружные капельки детской реки, вливаемся в море огромной страны» диэн ааттаах
бырайыагынан оҕолорго сайыҥҥы айымньы оскуолатын үлэлэтиэхпит. Манна 65 оҕону хабан, биир дойдулаахпыт олоҥхоһут И.Г. Тимофеев-Теплоухов «Куруубай хааннаах Кулун Куллустуур» олоҥхотуттан быһа тардан, оскуола выпускнига, билигин Москватааҕы П.И. Чайковскай аатынан консерватория устудьуона Никифор Яковлев муусукатыгар быһа тардыыны туруоран, Чурапчы нэһилиэгин 375 с. үбүлүөйдээх ыһыаҕар кытыннарыахпыт.
Сайыҥҥы оскуолаҕа оҕолор фольклорга, уруһуйга, ырыаҕа уонна үҥкүүгэ талааннарын чочуйуохтара, сахалар киэн туттар олоҥхолорун билсиэхтэрэ. Араас оонньууларга-куонкурустарга кыттыахтара, маастар кылаастарга, экскурсияларга ону сэргэ доруобуйаларын чэбдигрдэр дьарыктарга сылдьыахтара. Ол курдук, биир дойдулаахтарбыт: «Бриллианты Якутии» үҥкүү ансаамбылын декоратор-худуоһунньуга М.Г. Оконешникова, Олоҥхо тыйаатырын сүрүн артыыһа А.Алексеева, култуура үтүөлээх үлэһиттэрэ М.А. уонна В.П. Герасимовтар уо.д.а. маастар кылаастары ыытыахтара, идэлэрин туһунан кэпсиэхтэрэ. Бу олоҥхону туруорууга Дьокуускай куораттан Олоҥхо тыйаатыра, нэһилиэкпит дьаһалтата, улууспут култуураҕа уонна үөрэххэ салалталара күүс-көмө буолаллара былааннанар. Сүрүн оруолларга фольклор кылааһын үөрэнээччилэрэ, улууспут талааннаах оҕолоро оонньуохтара, уруһуйга сылдьар оҕолор туттуллар малы-салы, көстүүмнэри оҥоруохтара, үҥкүүгэ уонна ырыаҕа дьарыктанар оҕолор кыттыахтара.
Түмүккэ, Чурапчы улууһун коммерческайа суох тэрилтэлэри салайар ресурснай киин үлэһиттэригэр С.Д.Старостинаҕа уонна О.Г. Кардашевскаяҕа махталбытын тиэрдэбит. Улууспут оҕолорун бу оскуолаҕа кэлэн, сайыҥҥы сынньалаҥнарын туһалаахтык атааралларыгар ыҥырабыт.
