Бу күннэргэ Саха Өрөспүүбүлүкэтин Ил Дархан гранын кыайыылаахтарын быһаардылар. Чурапчы улууһа араас бырайыактары суруйан, сыллата кыттар. Бырайыагы суруйууга Олохтоох көҕүлээһини өйүүр агентство күүс-көмө буолар.
5 бырайыак кыайыылаах тахсан, улууспутугар 4 321 041 сууманы аҕалла. Ханнык бырайыактар кыайдыларый?
1, 2. Үөрэхтээһин хайысхатыгар Одьулуунтан “Эйгэ” уопсастыбаннай тэрилтэ “Школьный кластер-2” бырайыагынан 527 596 солкуобайы уонна “Туллукчаан” уһуйаан “Креативные инновационные студии генерации идей Сайан для детей-инвалидов и детей с ОВЗ в Чурапчинском районе” бырайыагынан 418 030 солкуобайы;
- Сокуоннай саастарын ситэ илик оҕолор быраабы кэһиилэрин туоратыыга уонна сэрэтиигэ туһуламмыт хайысхаҕа Г.П. Башарин аатынан Сылаҥ орто оскуолата “Трудовой отряд подростков “Башаринцы” бырайыагынан 996 803 солкуобайы;
- ТОС-тары сайыннарыыга туһуламмыт хайысхаҕа Арыылаах нэһилиэгэ “Спортивный Арылах – путь к здоровью и активному образу жизни” бырайыагынан 956 017 солкуобайы;
- Култуура хайысхатыгар “Совет патриотов” уопсастыбаннай тэрилтэ “Мастерская Silik – хранитель канона традиционного шитья” бырайыагынан 1 422 595 солкуобайы;
Ону тэҥэ, Чурапчы нэһилиэгин «Совет патриотов» уопсастыбаннай тэрилтэтэ «Вместе — как один» бырайыага РФ Бэрэсидьиэнин гранын кыайыылааҕынан таҕыста.
Наталья Александрова, бырайыак ааптара:
- Бырайыак орто саастаах дьахталларга, кинилэр доруобуйаларын тупсарыналларыгар, чөл олоҕу көҕүлээһиҥҥэ ананар. Манна чуолаан «Снежный волейбол» (Хаарга волейбол) көрүҥэр Чурапчы нэһилиэгин 35-тэн 45-гэр диэри саастаах кэрэ аҥаардарын уһуйуохтара, үөрэтиэхтэрэ. Кэлэр сыл муус устар ыйыгар түмүктүүр түһүмэххэ күрэх тэриллиэҕэ. Бу бырайыак уратыта диэн волейбол сибиэһэй салгыҥҥа, аһаҕас халлаан анныгар дьыл хаардаах кэмигэр күһүн, саас ыытыллыаҕа. Бырайыак уопсай суумата 862 714 солкуобайга тэҥнэһэр. Бу үбүнэн таһырдьа тымныыга оонньонор анал мээчиктэри, спортивнай тэриллэри ылыахпыт.
Ольга Кардашевская, бырайыактар салайааччылара:
— Одьулуун оскуолата былырыын “Школьный кластер труда” социальнай бырайыагынан Федеральнай граны ылбыта. Онон түннүгэ, муостата, ититиитэ суох турбут эргэ эбийиэги овощехранилище уонна арассааданы үүннэрэр киэҥ, сырдык дьиэни оҥорон таһаарбыттара. Бу барыта үлэһиттэр уонна үөрэнээччилэр көмөлөрүнэн олоххо киирбитэ. Ону салҕаан, бу иккис “Школьный кластер-2” бырайыак оҥоһуллубута. Салгыы оҕуруот аһын гидропоннай систиэмэҕэ үүннэрии ньымаларын үөрэтэн, олордон, онно үөрэнээччилэри кытыннарар сыал турар. Оҕолор бэйэлэрин кэтээн көрүүлэрин түмүгүнэн араас научнай-чинчийэр кэмпириэнсийэлэргэ кыттыахтара. Онон элбэх үлэ күүтэр. Бырайыакка аграрнай хайысха педагогтара уонна гуманитарнай хайысхалаах учууталлар үлэлэстилэр.
Г.П. Башарин аатынан Сылаҥ оскуолатын бырайыагар оҕолор сайыҥҥы кэмҥэ түргэнник ситэр кус, бройлер чоппууска иитэллэр, салгыы кус этин переработкалыыр кыра сыахха полуфабрикаттарын оҥоруохтара, научнай-чинчийэр кэмпириэнсийэлэргэ кыттыахтара, финансовай грамотноска үөрэниэхтэрэ.
Саргылана Старостина, “Мастерская Silik – хранитель канона традиционного шитья” бырайыак салайааччыта:
— Норуот маастардара Чурапчыга, Тааттаҕа уонна Дьокуускайдааҕы Ярославскай аатынан мусуойга баар экспонаттары көрөн, үөрэтэн, ону сөргүтэн, оҕолору уонна баҕалаах дьону сахалыы бууктаах сону тигэргэ үөрэтиэхтэрэ. Кэтээн көрүү түмүгүнэн соннор устуоруйаларын туһунан кинигэ тахсыаҕа. 17-с үйэтээҕи, билигин мусуойга экспонат быһыытынан кыайан турбат туруктаах дьахтар сонун куопуйатын оҥорон, Норуот маастардарын күнүгэр уонна ыһыахха дьон-сэргэ дьүүлүгэр таһаарыахтаахтар. Бырайыак ааптарынан норуот маастара Надежда Ахматова буолар.
Антон Янцен, Арыылаах нэһилиэгин баһылыга:
Биһиги бырайыакпыт аан бастаан «Оҕо иллэҥ кэмигэр спордунан дьарыктанарыгар туох ирдэнэрий?” диэн ыйытыктан үөскээбитэ. Арыылаах нэһилиэгэ уһук сиргэ сытар буолан, оҕону спортивнай күрэхтэргэ ыытарбытыгар уустуктары көрсөөччүбүт. Ол иһин оҕолор уонна олохтоохтор чөл олоҕу өйөөн, спорка таластыннар диэн спортивнай былаһааккалаах, тренажердардаах зонаны тэрийэр сыал турбута.
Бу бырайыак үөскүүрүгэр улахан көмөнү бэйэбит уолбут, ХИФУ устудьуона Ньургун Сыромятников, ону таһынан олохтоох дьаһалта исписэлиистэрэ, Дьокуускай куорат ресурснай киинин экспердэрэ оҥорбуттара.
Ил Дархан граннара биһиги курдук кыра нэһилиэктэргэ улахан көмө-тирэх буолаллар, тыа дьоно сайдарыгар биир улахан хамсааһынынан буолар.